Deutsch: VMI ENKORAJA MEMBRU UPF HALO PATRULLAMENTU RIGOROZU KONTROLA LIÑA FRONTEIRA HODI PREVENE VARIANTE DELTA COVID-19

Balibo, 08 jullu 2021 (SRP) – Vise Ministru Interior (VMI), Antonio Armindo akompaña husi ninia komitiva, hala’o vizita mai postu UPF Derok Ren iha Suku Lehito, Postu Administrativu Balibo, ne’ebe besik kedas area fronteira Indonezia nian no enkoraja membru UPF sira halo patrullamentu rigorozu kontrola pontu entrada hodi prevene variante Delta Covid-19. “Ohin ita mai hare diretamente kondisaun no problema seguransa nian ne’ebé Postu seguransa UPF Derok Ren nian hasoru no-mos preokupasaun balun atu bele fasilita atividade membru UPF sira nian hodi garante seguransa iha fronteira entre nasaun rua ne’e. Tanba ita hatene area ida ne’e maka dala wain komunidade sira uza hodi halo movimentu ilegal tanba besik kedas area fronteira terrestre ho nasaun viziñu Indonezia nian”, dehan Antonio Armindo iha, Postu UPF Derok Ren, kinta ne’e. Nia dehan, durante ne’e komunidade sira halo viajen ilegál tama husi fronteira Atambua, Indonézia liu fronteira Batugadé, Covalima no Oe-Cusse tanba ne’e Guvernu sei foti medida tau atensaun ba fronteira hotu hodi kria kondisaun ba membru sira ho ekipamentu prevensaun Covid nian. “Ita hotu hatene katak variante virus foun ne’e perigu tebes, atu evita tama ba ita nia nasaun ita tenke servisu hamutuk hodi reforsa seguransa iha fronteira liu hosi operasaun no halo patrullamentu konjunta ho ita nia forsa defeza iha fronteira hodi kontrola movimentu ilegál no prevene propagasaun COVID-19 no kontinua sosializa informasaun ba populasaun iha liña fronteira hodi evita halo kontaktu ho komunidade sira husi Indonézia”, nia dehan.

Governante ne’e mos husu ba membru UPF sira atu hametin liutan liña koordenasaun ho autoridade munisipiu no komunidade sira hodi bele informa karik iha atividade ilegal balu ne’ebe mosu iha area refere hodi evita tranzmisaun COVID-19 variante foun ne’e tama mai teritoriu nasional.